ऊ आजादी पवलें भइया
जिनकर नाव नँगरेस महान
भगई बाबा बाप हो गइलें
चाचा नामी नेहर सयान।
राजा बदलल परजा वइसे
जीये जीये हिन्दुस्तान
गदहा जनम एक के छूटल
पहिर गुलाबी बनल परधान।
लइका भटके दारू पीये
बाप पखंडी लगलें घाट
एक अकेल छौंड़ी हमरी
क द परजा लाट के ठाठ।
बिटिया रानी बड़ी सयानी
घोघ्घो खेले पानी छाड़
सीमा पर कटल जवानी
चचा निहारें नोबल ठाड़।
दुस्मन के मूड़ी दे गइलें
अम्मा छाती परजा असवार
एमरजेंसी फफेल्ला धइलस
फूट टूट लूट बड़वार।
अम्मा दुरगा कतल हो गइली
बेटवा कर कर करे करार
तोप तोप के घोंप घोटाला
पोप देस जोरू भरतार।
बेटवा सेना सांती पोसे
कटें हजारो लंका के तीर
फाटल धरती मूड़ अकासी
धन्न धन्न जय बंता बीर।
राजा के रजधानी वइसे
परदा पीछे रानी मुसमाति
मौनी बाबा ताज असमानी
घोटालन भाँति के भाँति।
राज बदलिहें परजा वइसे
जीये जीये हिन्दुस्तान
गदहा जनम एक के छूटी
अरबो खरबो हिन्दुस्तान।
